ما هي الموسيقى؟

طب دلوقتي احنا في الموضوعين اللي فاتوا شرحنا إيه هي نظرية الموسيقى وإيه فايدتها، بس خلينا نسأل سؤال أبسط، إيه هي الموسيقى؟ فيه إجابات كتير على الموضوع ده، يعني مثلاً وليام شكسبير قال على الموسيقى

’غذاء الحب‘

 جوتفيرد ويلهم قال

 ’الرياضيات المسموعة‘

 بس خلونا نجرب ده:

الموسيقى هي علم ترتيب الصوت والصمت في بيئة الوقت. 

دلوقتي الموضوع بقى أوضح ، بس لسة عام شوية بردو، تم نجرب واحد تاني أكثر تحديداً؟ 

الموسيقى هي توالي عدة نغمات متنظمة في إيقاع محدد. 

أحسن؟ بس التعريف ده بردو مش بيغطي كل حاجة اسمها "موسيقى" ، بس على الأغلب بيغطي كل الأنواع اللي أنت عارفها خصوصاً موسيقى القرن العشرين من الراجتايم للراجدج للروك وكل اللي بينهم.

حاجة عايز أشير ليها، وهي كلمة "نظرية" ، مش بالمفهوم العلمي زي نسبية أينشتاين أو نظرية الإنفجار العظيم، كلمة نظرية هنا بتشير لدراسة مباديء الموسيقى والحاجات الأساسية اللي المفروض العازف والمستمع يعرفوها عشان ينتجوا أو يستمتعوا بالفن المدهش ده، وده بيرجعنا للمفهوم الأصلي اللي هو " الطريقة اللي بنبص بيها لحاجة"، لو زودنا المفهوم ده وخليناه يتضمن العزف والإستماع مش مجرد النظر بس، يبقى كدة عرفنا المقصود بالظبط.

وزي ما قُلنا إن الموسيقى هي توالي عدة نغمات في إيقاع محدد، في المواضيع الجاية هنفهم يعني إيه نغمات، وهنسيب "الإيقاع المحدد" ده لوقت تاني. 

مقدمة في دراسة نظرية الموسيقى

السلام عليكم،

النهاردة حابب أتكلم معاك في ليه دراسة نظرية الموسيقى مهم، حتى ولو شوية. بس مهم جداً تعرف إن الموسيقى جت الأول، يعني الموسيقى موجودة من آلاف السنين وبعد كدة النظرية جت عشان تشرح وتحلل ليه هي حلوة أو ليه بتsounds good، فلازم نعرف إنك مش عشان مش دارس النظرية تبقى موسيقي أو عازف وحش، في الحقيقة أنت لو موسيقي حلو فأنت تعرف كثير في النظرية، أنت بس مش عارف المصطلحات أو الصيغ العلمية للحاجات اللي بتعملها.

الموسيقى لغة جديدة بتتعلمها

بص المفاهيم والقواعد اللي الموسيقى مبنية عليها أشبه بقواعد النحو اللغوية، واللي بردو جت بعد فترة بعد ما الناس قدروا يتكلموا مع بعض، وقدرة الناس على إنهم ينقلوا اللغة دي خلاهم يسمعوا محادثات وقصص زي ما الراوي قصدها، وقدرة الناس على نقل الموسيقى خلاهم يقرأوا ويلعبوا مقطوعات زي ما المؤلف كان يقصدها. أهو إنك تتعلم الموسيقى كأنك بتتعلم لغة، ولما توصل لمستوى الفصيح هتبقى قادر ساعتها على إنك تسمع محادثات من ورقة تحس إن مكتوب فيها طلاسم :"D

أيوة بردو مش فاهم هتفيدني بإيه النظرية؟ 

فيه ناس كتير في العالم مش بيعرفوا ولا يقرأوا ولا يكتبوا "أُميين"، بس على الأقل بيعرفوا يتواصلوا ويعبروا عن نفسهم وعن مشاعرهم، وفيه بردو موسيقيين كتير من المتعلمين ذاتياً مش بيعرفوا لا يكتبوا ولا يقرأوا نوتة، وشايفين إن نظرية الموسيقى بأكلمها ثانوية وغير ضرورية، بس النظرية هتساعدهم في إنهم يتعلموا تيكنيك جديد، يلعبوا في ستايلات جديدة ومختلفة، ويطورا من نفسهم، وهيساعد جداً طبعاً إنك تبدأ تكتب المقطوعات بتاعتك! هتبقى زي عمر خيرت وبيتهوفن أخيراً؟! لأ ماتتعشمش أوي كدة لازم تدرس التأليف وتتعب جداً وتقعد سنين في تنمية مهاراتك :"D

في الموضوع الجاي هنبدأ أول درس بإذن الله. 

دراسة نظرية الموسيقى

السلام عليكم،

في المدونة دي أنا هشرح مواضيع في الموسيقى.. ازاي فيه موسيقى حزينة وموسيقى سعيدة؟ ليه الموسيقى حلوة؟ يعني إيه اللي بيخليها تطلع حلوة ومريحة للودن ساعات وساعات لأ؟ كل ده هشرحه، وفي نفس الوقت قراءة النوتة الموسيقية، لأن مش كل الناس بتعرف تروح لكورس أو لمدرس لأياً كان السبب.

 وهبدأ بكلمة ميوزكولوجي، الجزء الأول من الاسم "ميوزك" يعني موسيقى، و"لوجي" يعني علم، على بعضها يعني علم الموسيقى، في المواضيع اللي جاية هتلكم عن النغم، والإيقاع، وازاي بيندمجوا مع بعض عشان يكونوا لحن، وهنبدأ نتكلم عن الأبعاد، والهارموني، وتدوين كل الكلام اللي فات ده، وفي مواضيع تانية هتكلم عن مقطوعات معينة، مقطوعات سمعناها قبل كدة واللحن علق معانا بس مش عارفين اسمها، أو مقطوعات مفروض نعرفها عشان هي حلوة.